من مخرجات العولمة والفوضه
قام الولد يلبس لباس بنيه
وسـويرته في معصمه للموضه
ويقول هـاذي قمة الحريه
وانْ قلت له ذي عادة ٍ مرفوضه
قال إنت رجعي ورؤيتك سلبيه
حتى الصلاة الواجبه المفروضه
نفس الشقي عن ذكرها ملهيــه
في طرد نوره أو ترقم روضـه
اللي لهم باردى السوالف نيه
لأجل اسوره أو ساعةٍ أو بوضه
تشـوف بنت المبتلي مبليه
ولا عودت بنت الشقا مخضوضه
قالت أبـوي اشْـَوِّيبٍ يا حيه
وسوت رجيم أم نعفه مقروضه
وحطت فلرز بشفةٍ ورديه
والنكره اللي كنهـا بعوضـه
فوق الرجيـم مسويه لحميه
ويوم أصبحت من أهلها مبغوضه
راحت وطاحت رجلها بالخِيِّـه
بس أمها اللي نفسهـا مقبوضــه
في جوفها نار المصيبه حيه
ولو الفتاه مْصَلْيِه موعوظـه
ما ظنهـا بتسلك طريق الحيه
أما أخوهـا المفتتن بالموضـه
يكره مطوع ديرته بواللحيه
حتى أبوه المبتلش بقروضـه
ماخذ على أمه شيفةٍٍ هندية
وأم القضايا المشكلة منقوضـه
صارت بعدها في المحاكم ليه
من ذا الحوادث والبلا والفوضـه
اللي بها كْثُرَوا شباب الصيه
وكل الأمور المؤلمه المعروضة
هاذي نتيجـه للحوادث حيـه
هذا يوم من الألم برضوضـه
وذاك الخبل وتطــارده دوريه
وذاك الكسر من سرعته في حوضه
وهــذاك فاقـد عيلته وخويّه
