نفائس

أعزائي متابعي صفحة فيوضات شعرية, يتجدد معكم اللقاء في هذا العمود مع اطلالة هذه الصفحة في كل شهر, وأقدم لكم فيه نفائس من الشعر الشعبي الطيب الأثر, المليء بالحكم والمواعظ, اخترتها لكم من تراث كبار الشعراء في شبه الجزيرة العربية.
ياحمود يظهر لك صديق ٍ من القوم
ويظهر من الربع المِدانين عدوان
الله نشد ياحمود عن معرفة يوم
وحِنّا ثمان سنين ياحمود جيران   
نمر بن عدوان
ماني بضحاك ٍ على غير مصلوح
يضحك لخلان ٍ وهم عايفينه
المقفي  اقفي عنْه لو كان مملوح
والمقبل انهض له شراع السفينه
عبدالله بن سبيّل
الذل يوريك الهوان وتنتمي
إلى أمةٍ في مرتع الذل هايمه
وبُعدك عن الأنذال فيه المعزه
في مهمهٍ صيد المها في خرايمه
الأمير محمد السديري
إن كان ما طبع المراجل قديما
الطبع يسبق ما تفيد التعاليم
عبدالله بن ربيعه
فِان كان ماتعطي والأيام جزله
فالايام لازم عدْلهن يميل
والعوشزه ماياقع الحُر فوقها
ولا بها لْسمحين الوجيه مِقيل
وإن كان مانفع الفتى في حياته
ترى النفع مِن بعد الممات قِلَيل
ألا ما أكثر الخلان يوم نعدهم
كثير ٍ وعند الموجبات قِليل
الشريف جري الجنوبي
ترى رزق غيري ياملا ماينولني
ورزقي يجي لو كل حي ٍ يخايله
يرزقني رزّاق الحيايا بْحجرها
لا خايلت برق ٍ ولا هيْ بخايله
حجرف الذويبي
اصبر على الشدات من جور الأيام
لو كنت مابين الملايين مظلوم
وحاول تعوّض ماضي الأمس واليوم
وإن كنت جالس تنفض الكسل وتقوم
بالجد لو تتعب من السير الاقدام
ولا يردّك حندس الليل وغْيوم
إبراهيم بن محمد الخليفي