الشاعر طارق أحمد العنايشة الدوسري شاعر بحريني شاب قادم إلى الساحة الشعرية بقوة - نرحب به عبر هذه الصفحة
يقول من حار القلم في يمينه
البوح عيا ينتظم في القوافي
من نيةٍ والله ماهي بشينة
نية نواها والنوايا خوافي
ناوي يسوق النصح والله يعينه
واللي يسوق النصح يلقى التجافي
السر يعصى للذي يستبينه
إلا على خلٍ تصافيه وافي
والنصح للواعي هدية ثمينة
ولا الردي دوبه عن النصح غافي
متى يقوم اللي غفل في سنينه
كبر وساد وشد فوقه لحافي
يرضيك ياللي غافل ما لقينا
من غفلتك سادو علينا السخافي
إعلومنا تدري بها كل مدينة
في وجه من يعدى علينا ضعافي
النوق ناخت والسوابق ركينه
فرساننا عافوا السيوف الرهافي
ناكل ونشرب وانتحلى بزينه
ونام ترس عيوننا ما نخافي
على أمانة حطها الله بدينه
نسأل عليها يوم محدٍ ينافي
أرثي شبابٍ غارقٍ في ضنينة
مجرور لحتوفه كجر الخرافي
ياكل طرب يشرب طرب من حنينه
يبكي على حبٍ سقاه الحسافي
يرقص على دق الدفوف ويلينه
عزفٍ يجر المايلات بسفافي
والعقل غايب لعبته فـ المكينه
والمخ مسطولٍ كما لوح طافي
هذا بعض والباقي نصبوا كمينه
لفكار هدامه وحلمٍ خرافي
معقول كبلتوا الشموخ بعرينه
مغصوب يمشي تالي الركب حافي
وين المُرُوَّه ياعيال اللذينَ
ذاقوا من أنواع المرارات صافي
أهل الريادة شرعوا كل مينا
أهل التقى والمرجلة والعفافي
اْخذوا عبر اْخذوا دروسٍ تجينا
ببلاش من ناس غدوا فـاللفافي
اللي على الإسلام شرعه ودينه
ما يصير عزمه خافت النور طافي
ما تظهرون أحلام فينا دفينة
تبغي تلبي صوت للذل نافي
يالله افزعوا من نومة مستكينه
آن الأوان انخطط لوقت لافي
السم ناقع والدوا عارفينه
ترياقنا علمٍ يزيل الزعافي
بابحاثنا نرفع شراع السفينه
ونوجه الدفة بإيمان كافي
يا الله عسى قولي يدوي طنينه
فاذان من يوعون حكي السنافي
يا الله لاتارث كلامي الضغينة
أنت عليك علاجنا والتشافي
طارق الدوسري
